[轉載香港蘋果]90後校園「茉莉花革命」

全球熱爆茉莉花，軍隊公安都怕怕。八方聽聞北區名校風采中學有班學生，最近都發動咗場校園「茉莉花革命」，抗議學校「執髮」過嚴，然而返學帶紮花唔方便又太張揚，班 90後就諗到用茉莉花香 Tempo紙巾抗命，將紙巾放在枱面無聲抗議。

抗議校方「執髮」過嚴

呢 單嘢表面上係校園事件，實際上係涉及 90後爭取「髮言權」嘅維權事件，八方促請新界東議員長毛介入，監察校方係咪無髮無天。有風采學生透露，呢場「大屠殺」喺上個月 24號發生，當日周會之後老師在禮堂「執髮」，睇吓學生髮型有冇鬼五馬六飛輪海咁款，結果有成百幾個疑似潮童中招齊齊記過，高年級係重災區。
學 生守校規本來好應份，髮型太浮誇斷正邊有得怨？但係有人擺明短頭髮合晒格都俾人捉，連平日被老師讚係眾人典範乖乖仔嗰啲都中伏，就真係唔抵嘞。有高年級生 覺得死得寃枉，要老師解釋，老師卻同公安一樣唔回應。有個老師就答得最有趣，話同學嘅髮型今日唔長，預計都會好快長，所以要預先 mark名立此存照。
唔使講，民怨最後梗係爆煲，學生就在校友 facebook民主牆大吐苦水，結果民主牆都忽然被「河蟹」，喺 28號午夜 12時神秘關閉，留下「噢，風采，你錯了，你們錯了，我們是無罪，為何封殺我們」嘅遺言。

校長：以往尺度過寬

90後過去十幾年耳濡目染父母上街抗爭，家陣終於派上用場，有學生喺網上發起「帶一包茉莉花味 Tempo入學校」嘅行動，八方聽聞唔少學生上堂時真係將包紙巾放在枱面，花香無聲飄送，令人心曠神怡。學生會隨即搵校方傾偈，學校承諾會畀個說法，仲叫學生唔好過份渲染件事。

據問一點也不大陣仗…

八 方直接搵校長曹啟樂問個明白，佢話以往對學生髮型過寬，所以近日要嚴厲「執髮」，「形勢好似大陣仗咗，有啲學生反映老師嚴格咗啲，感到委屈」。佢話「執 髮」當日冇 100人被記過咁誇張，之後亦容許學生上訴，有 10人上訴得直。曹校長又話，冇見過學生展示茉莉花紙巾去響應校內「茉莉花革命」，又強調校方冇「河蟹」網上留言。
pf_lee@appledaily.com 

(李八方)